कोशी सत्ताको चाबी हिक्मतको हातबाट खोस्न सांसदहरूलाई फोनमार्फत ओलीको उक्साहट

काठमाडौं– कोशी प्रदेश सरकारलाई लिएर नेकपा (एमाले) भित्रको विवाद थप चर्किएको छ ।

पार्टी अध्यक्ष केपी शर्मा ओलीले मुख्यमन्त्री हिक्मत कार्कीलाई हटाएर संसदीय दलका उपनेता तिलकुमार मेन्याङ्बोलाई मुख्यमन्त्री बनाउने पहल थालेका छन् ।

यसका लागि सचिव शेरधन राईलाई सक्रिय बनाइएको छ भने कार्कीविरुद्ध अविश्वास प्रस्ताव ल्याउने तयारी भइरहेको बताइएको छ ।

असन्तुष्ट प्रदेश सभा सदस्यहरूलाई ओलीले फोन गरेर एउटै व्यक्तिलाई पटक–पटक अवसर दिनुभन्दा नयाँ र आदिवासी समुदायका व्यक्तिलाई सहयोग गर्नुपर्छ भन्ने सन्देश दिएका छन् ।

एमालेका ३९ सांसदमध्ये बहुमत आफ्नो पक्षमा पार्ने प्रयास भइरहेको स्रोतको दाबी छ ।

तर, कोशी सरकार संविधानको धारा १६८ (५) अन्तर्गत गठन भएकाले अविश्वास प्रस्तावबाट कार्की स्वतः पदमुक्त नहुने कानुनी बहस चलिरहेको छ ।

मुख्यमन्त्री कार्कीले राजीनामा दिन अस्वीकार गर्दै पद छाड्नुपरे पार्टी कमिटीको लिखित निर्णय चाहिने अडान राखेका छन् ।

प्रतिक्रिया दिनुहोस्