लाइसेन्स प्रणालीमै नयाँ झन्झट : मेडिकलमै सकस, १५० रुपैयाँको शुल्कमा ५०० रुपैयाँ ‘एपोइन्टमेन्ट चार्ज’ माग्दै चिकित्सक

काठमाडौं । यातायात व्यवस्था विभागले सवारी चालक अनुमतिपत्र (लाइसेन्स) को नयाँ अनलाइन प्रणाली लागू गर्दै सेवा थप सहज, छिटो र पारदर्शी हुने दाबी गरेको छ । तर, कार्यान्वयनको सुरुवाती चरणमै सेवाग्राहीले एकपछि अर्को समस्या भोग्नुपरेको गुनासो गरेका छन् । विशेष गरी, मेडिकल परीक्षण सम्पन्न नगरेसम्म अनलाइन शुल्क तिर्ने प्रक्रिया नै अगाडि नबढ्ने भएकाले धेरै सेवाग्राही सुरुमै अल्झिएका छन् ।

नयाँ प्रणालीअनुसार सेवाग्राहीले अनलाइन फाराम भरेपछि विभागले सूचीकृत गरेका चिकित्सकबाट मेडिकल परीक्षण गराउनुपर्ने हुन्छ । चिकित्सकले अनलाइन प्रणालीमा मेडिकल रिपोर्ट प्रमाणित गरेपछि मात्र सेवाग्राहीले अनलाइनबाट राजस्व तथा अन्य शुल्क भुक्तानी गर्न पाउने व्यवस्था छ । तर, यही मेडिकल प्रक्रियामै सेवाग्राहीले सबैभन्दा बढी समस्या भोगिरहेको गुनासो गरेका छन् ।