अखाद्य वस्तु तथा मापदण्डविपरीत कारोबार गर्ने चार व्यवसायलाई २० हजार जरिवाना

१८ साउन, धनकुटा । धनकुटा बजार क्षेत्रमा गरिएको छड्के बजार अनुगमनका क्रममा खाद्य मापदण्ड उल्लंघन गरेको तथा उपभोक्ता हितविपरीत व्यवसाय सञ्चालन गरेको पाइएपछि एउटा दुग्ध डेरीसहित तीन मिठाई तथा होटल व्यवसायलाई जनही पाँच हजार रुपैयाँका दरले कूल २० हजार रुपैयाँ जरिवाना गरिएको छ । जिल्ला प्रशासन कार्यालय धनकुटाको संयोजनमा खाद्य प्रविधि तथा गुण नियन्त्रण कार्यालय, धनकुटा नगरपालिका, उद्योग वाणिज्य संघ, जिल्ला प्रहरी कार्यालय तथा नेपाल पत्रकार महासंघ धनकुटाको प्रतिनिधिसहितको संयुक्त टोलीले भीमनारायण चोकदेखि मदनचोकसम्म सञ्चालित मिठाई पसल, होटल, बिस्कुट उद्योग र डेरीमा छड्के अनुगमन गरेको थियो ।

अनुगमनका क्रममा न्यू भुलेन होटल, विद्यानन्द मुखियाद्वारा सञ्चालित मिठाई पसल र हेलो ब्रदर स्वीट एण्ड चाट हाउसमा सरसफाइको अवस्था सन्तोषजनक नरहेको, एउटै तेल पटकपटक प्रयोग गरिएको र बिल जारी नगरेको तथा कारोबारको अभिलेख नराखेको पाइएपछि जनही ५ हजार रुपैयाँ जरिवाना गरिएको छ । यसै गरि दुग्ध डेरी पसलमा बिक्रीका लागि राखिएका दुग्धजन्य पदार्थमा आवश्यक लेबल नराखिएको तथा बिलको अभिलेख नराखिएको पाइएपछि ५ हजार रुपैयाँ जरिवाना गरिएको जिल्ला प्रशासन कार्यालयका प्रशासकीय अधिकृत रामजी पौडेलले जानकारी दिए ।