सुनसरीमा लगाइएको निषेधाज्ञा पूर्ण रूपमा हटाइयो

सुनसरी : जिल्ला प्रशासन कार्यालय सुनसरीले जिल्लामा जारी रहेको निषेधाज्ञा पूर्ण रूपमा हटाएको छ। प्रमुख जिल्ला अधिकारी ईश्वरीप्रसाद अर्यालले सोमबार जारी गरेको सूचनाअनुसार जिल्लामा विकसित पछिल्ला घटनाक्रमको समीक्षा गर्दा सुरक्षा अवस्था सुधारोन्मुख रहेको निष्कर्षपछि स्थानीय प्रशासन ऐन, २०२८ को दफा ६ को उपदफा ३ (क) बमोजिम यसअघि जिल्लाका विभिन्न स्थानमा लागू गरिएको निषेधाज्ञा हटाइएको हो।

देवानगञ्ज गाउँपालिका-३ कप्तानगन्ज घटनापछि सुरक्षा संवेदनशीलतालाई मध्यनजर गर्दै सुनसरीमा विभिन्न क्षेत्रमा चरणबद्ध रूपमा कर्फ्यु तथा त्यसपछि निषेधाज्ञा लागू गरिएको थियो। पछिल्लो समय जिल्लाको शान्ति–सुरक्षा अवस्था सामान्य बन्दै गएको मूल्याङ्कनपछि प्रशासनले निषेधाज्ञा हटाएको जनाएको छ।