गोलभेडा सस्तो, किसानको दुःख महँगो

भक्तपुरको सूर्यविनायक नगरपालिका–१० चितपोलमा व्यावसायिक रूपमा गोलभेडा खेती गर्दै आएका किसान रिखेश्वर भट्टराईको बारीमा अहिले सबैतिर लटरम्म राताराता गोलभेडा फलेका छन् । फागुन १० गतेदेखि रोपेको गोलभेडा सबैतिर लटरम्म फल्दा उनको मुख हँसिलो हुनुपर्ने थियो । तर विडम्बना, त्यसो हुन सकेको छैन, बरु उनको अनुहारमा गहिरो निराशा देखिन्छ ।

हरियालीले ढाकिएको गोलभेडाको बारी हेर्दा यसपालि राम्रो आम्दानी हुने आशा पलाएको थियो । तर फलेको गोलभेडा अहिले प्रतिकेजी १२ रुपैयाँमा बेच्नुपर्दा उनलाई चित्त दुखेको छ । “१२ रुपैयाँमा गोलभेडा बेच्नु भनेको उत्पादन बेच्नु होइन, घाटा बेच्नु हो,” उनी भन्छन्, “यति मूल्यले त मजदुरलाई गोलभेडा टिप्न दिएको ज्याला पनि पुग्दैन । बरु खेतमै कुहिन दिनु नै सस्तो पर्छ जस्तो अवस्था आएको छ ।”