नीता ढुंगानाको दमदार रूपान्तरण

अभिनेत्री नीता ढुंगानाले फिल्म पार्वतीको टिजरमार्फत आप्mनो अभिनय क्षमताको अर्को सशक्त पक्ष प्रस्तुत गरेकी छन्। सार्वजनिक टिजरमा अटिजम भएकी युवतीको भूमिकामा देखिएकी उनको अभिनयले दर्शक र फिल्मकर्मीबाट तारिफ पाइरहेको छ।

टिजरमा नीताले अटिजम पीडित युवतीको भावभंगी, हाउभाउ र भाइप्रतिको निश्छल माया स्वाभाविक ढंगले प्रस्तुत गरेकी छन्। संवेदनशील र चुनौतीपूर्ण पात्रलाई जीवन्त बनाएको भन्दै सामाजिक सञ्जालमा उनको अभिनयको प्रशंसा भइरहेको छ। विभिन्न चरित्रमा आफूलाई रूपान्तरण गर्न सक्षम अभिनेत्रीका रूपमा परिचित नीताले यसअघि किसान, मसान, नोटबुक, ६ एकान ५, पञ्चायतलगायत फिल्ममा फरक–फरक भूमिका निर्वाह गर्दै आएकी छन्। विशेषगरी पञ्चायतमा एक अबोध किशोरीको भूमिकाले उनको अभिनयलाई समीक्षक र दर्शकबाट उच्च प्रशंसा दिलाएको थियो। पञ्चायत र पार्वती दुवैका लेखक शिवम् अधिकारी हुन्।