‘जलवायुमैत्री प्रविधि प्रयोग गरेर धानमा आत्मनिर्भर हुनुपर्छ’

धनुषा । जलवायुमैत्री कृषि प्रविधिको प्रयोगमार्फत धान उत्पादन वृद्धि गर्दै धानमा आत्मनिर्भर बनाउनुपर्नेमा जोड दिइएको छ। २३औँ राष्ट्रिय धान दिवस तथा रोपाइँ महोत्सवका अवसरमा धनुषामा साेमबार आयोजित कार्यक्रमका वक्ताहरूले देशलाई धानमा आत्मनिर्भर बनाउनका लागि समयानुकूल प्रविधिको प्रयोग गर्नुपर्नेमा जोड दिए।

‘जलवायुमैत्री प्रविधि, धानमा आत्मनिर्भरता र समृद्धि’ भन्ने मूल नारासहित आयोजित कार्यक्रममा राष्ट्रिय धानबाली अनुसन्धान कार्यक्रम हर्दिनाथका धान संयोजक डा. मथुरा यादवले जलवायु परिवर्तनका कारण धान खेतीमा देखिएका चुनौती सामना गर्न आधुनिक तथा जलवायुमैत्री प्रविधिको प्रयोग अपरिहार्य भएको बताए। उनले उन्नत जात, गुणस्तरीय बीउ, सिँचाइ व्यवस्थापन र वैज्ञानिक खेती प्रणाली अपनाए उत्पादन वृद्धि गर्न सकिने धारणा राखे।