शाइन रेसुङ्गाको नाफा ८३ प्रतिशत बढ्यो, कर्जा जोखिम भने उकालो

काठमाडौं १९ साउन । शाइन रेसुङ्गा डेभलपमेन्ट बैंकले आर्थिक वर्ष २०८२/८३ मा १ अर्ब १८ करोड १२ लाख रुपैयाँ खुद नाफा कमाएको छ। बैंकले सार्वजनिक गरेको चौथो त्रैमाससम्मको अपरिष्कृत वित्तीय विवरणअनुसार नाफा अघिल्लो वर्षको तुलनामा ८२.९७ प्रतिशतले बढेको हो। अघिल्लो आर्थिक वर्षमा बैंकले ६४ करोड ५६ लाख रुपैयाँ नाफा कमाएको थियो।

बैंकको नाफा उच्च दरले बढ्नुमा नियमित आम्दानीको वृद्धिभन्दा कर्जा नोक्सानी व्यवस्थामा आएको ठूलो कमी प्रमुख देखिन्छ। खुद ब्याज आम्दानी ६.९ प्रतिशतले बढेर २ अर्ब ८२ करोड ६७ लाख रुपैयाँ पुगेको छ। तर इम्पेरमेन्ट चार्ज ९५ करोड ४ लाख रुपैयाँबाट घटेर २० करोड ८० लाख रुपैयाँमा सीमित भएको छ।