महँगी नियन्त्रणमा गम्भीरताको खाँचो

दिन–प्रतिदिन बढ्दै गएको महँगीले गर्दा अहिले सर्वसाधारणको जीवन कष्टकर बन्दै गएको छ । अहिले बजारमा खाना पकाउने ग्यासको अभाव छ । चामल, दाल, तेल, चिनी, तरकारी, अण्डादेखि खाना पकाउने ग्याससम्मकै मूल्य लगातार बढिरहेको छ । आम्दानीको स्रोत सापेक्षिक रुपमा स्थिर रहने र दैनिक उपभोग्य सामग्री एवं खाद्य सामग्रीको मूल्य निरन्तर बढ्ने विरोभाषका बीच आम मानिसको जीवनयापन कठिन बन्दै गएको छ ।

हिजो मात्रै पेट्रोलियम पदार्थको फेरि मूल्यवृद्धि भएको छ । पेट्रोलियमको निरन्तर मूल्यवृद्धिले ढुवानी खर्च बढाएको छ भने त्यसको प्रत्यक्ष असर उपभोग्य वस्तुको मूल्यमा परेको छ । यसले गर्दा आम नागरिकलाई जीवनयापन गर्न कठिन हुँदै गएको छ ।