सामाजिक सञ्जालमार्फत पत्रकारलाई ज्यान मार्ने धम्की दिने व्यक्ति पक्राउ गर्न महासंघको माग

काठमाडौं । नेपाल पत्रकार महासंघले पत्रकारिता क्षेत्र र क्रियाशील पत्रकारहरूलाई बदनाम गराउने तथा ज्यान मार्ने धम्की दिने कार्यमा संलग्न भएको भन्दै झापाका नवराज ओली (नितेश) लाई पक्राउ गर्न माग गरेको छ । सोमबार एक प्रेस विज्ञप्ति जारी गर्दै महासंघले झापाको हल्दिबारी गाउँपालिका-१ का ओलीका गतिविधिप्रति गम्भीर ध्यानाकर्षण भएको जनाएको हो ।

विभिन्न अपराधमा संलग्न भई हाल फरार रहेका ओलीले सामाजिक सञ्जाल र सन्देशहरूमार्फत भ्रामक सामग्री प्रसारण गरिरहेको विज्ञप्तिमा उल्लेख छ । उनले महासंघको झापा शाखा, शाखा अध्यक्ष तथा अन्य पदाधिकारीहरूविरुद्ध अनर्गल प्रचारप्रसार गर्दै मानमर्दन र चरित्रहत्या गर्नुका साथै ज्यान लिने धम्की दिइरहेको महासंघको कोशी प्रदेश समितिले जनाएको छ ।