क्यान्सरपीडितका लागि १६० किमी पौडिने बार्तोलोमी बाल्टिक सागरलाई जित्ने त्यो ५५ घण्टा

(एजेन्सी)

रातको घनघोर अँध्यारो, चिसो पानी र छालहरूको निर्मम प्रहारका बीच विशाल बाल्टिक सागरको अथाह गहिराइमा आफ्नो सपना र अद्भुत आँट बोकेर एकजना मानव अघि बढिरहेको थियो । पोल्यान्डका साहसी पौडीबाज बार्तोलोमी कुब्कोभ्स्कीले स्विडेनको दक्षिणी तट कासेबर्गाबाट यो यात्रा सुरु गर्दा ५५ घण्टाभन्दा बढी समय बिनाकुनै विश्राम, बिनानिद्रा र सहारा डुंगालाई समेत नछोई १६० किलोमिटरभन्दा बढी दूरी पार गर्नु धेरैका लागि केवल एउटा पागलपन जस्तै लागेको थियो । तर, अदम्य साहस र अटल अठोटका अगाडि बाल्टिक सागरको कठोरता पनि अन्ततः नतमस्तक भयो । जब उनी लगातार दुई दिन र दुई रातभन्दा बढी समयको अमानवीय संघर्षपछि पोल्यान्डको जिवनुभ तटमा आइपुगे, तब उनले केवल एउटा विश्वकीर्तिमान मात्र बनाएनन्, मानव क्षमताको नयाँ क्षितिज उघारे ।