मादुरोलाई हटाएको सात महिनापछि भेनेजुएलामा चुनाव गराउन ट्रम्प प्रशासनमाथि अमेरिकी सिनेटरहरूकै दबाब

एजेन्सी । अमेरिकी राष्ट्रपति डोनाल्ड ट्रम्पको प्रशासनले भेनेजुएलाका तत्कालीन राष्ट्रपति निकोलस मादुरोलाई सत्ताच्युत गरी कार्यवाहक राष्ट्रपतिको जिम्मा तत्कालीन उपराष्ट्रपतिलाई दिएको सात महिना पूरा भएको छ। यसैबीच, अमेरिकाका रिपब्लिकन र डेमोक्र्याट दुवै दलका सिनेटरहरूले भेनेजुएलामा तत्काल स्वतन्त्र र निष्पक्ष निर्वाचन गराउनुपर्ने माग गर्दै संयुक्त प्रस्ताव अघि सारेका छन्।

रिपब्लिकन सिनेटर टेड क्रुज र डेमोक्र्याट सिनेटर जिन शाहीन्को नेतृत्वमा मंगलबार अमेरिकी सिनेटमा प्रस्तुत गरिएको यस प्रस्तावले भेनेजुएलाको लोकतान्त्रिक प्रक्रियामा अमेरिकी समर्थनलाई पुनः पुष्टि गरेको छ। उक्त प्रस्तावमा सम्पूर्ण राजनीतिक बन्दीहरूको निःसर्त रिहाइको माग गरिएको छ। साथै, सार्वजनिक पदका लागि उम्मेदवारी दिने कुनै पनि व्यक्तिलाई लक्षित गरी आक्रमण वा क्षति पुर्‍याउने जोसुकैलाई पनि कडा कारबाहीको दायरामा ल्याउनुपर्ने र यसमा वरिष्ठ सरकारी अधिकारीहरूलाई समेत छुट दिन नहुने कुरामा जोड दिइएको छ। यस द्विदलीय प्रस्तावलाई थप पाँच जना सिनेटरहरू (चार डेमोक्र्याट र एक रिपब्लिकन) ले समर्थन गरेका छन्।