‘पर्यटन उठे, नेपाल उठ्छ’ नारासहित युविका भण्डारीको चुनावी टोली घोषणा

काठमाडौं- नेपाल एसोसिएसन अफ टुर एन्ड ट्राभल एजेन्ट्स (नाट्टा) को आगामी २०२६–२०२८ कार्यकालका लागि हुने निर्वाचनको माहोल दिनप्रतिदिन तातिँदै गएको छ। यही क्रममा अध्यक्ष पदकी उम्मेदवार युविका भण्डारी नेतृत्वको प्यानल औपचारिक रूपमा सार्वजनिक भएको छ। "पर्यटन उठे, नेपाल उठ्छ" भन्ने मूल नारासहित सार्वजनिक गरिएको उक्त प्यानलले पर्यटन व्यवसायको संरक्षण, संस्थागत सुधार, सुशासन, पारदर्शिता तथा व्यावसायिक हितलाई केन्द्रमा राखेर चुनावी अभियान अघि बढाएको जनाएको छ।

लामो समयदेखि नेपालको पर्यटन तथा ट्राभल व्यवसायमा सक्रिय रहँदै आएकी युविका भण्डारी नाट्टाको महासचिवको जिम्मेवारी सफलतापूर्वक निर्वाह गरिसकेकी अनुभवी व्यवसायी हुन्। संस्थाभित्रको लामो अनुभव, पर्यटन क्षेत्रका समस्या र सम्भावनाबारेको गहिरो बुझाइ तथा व्यवसायीको साझा हितका विषयमा निरन्तर आवाज उठाउँदै आएको अनुभवका कारण उहाँको उम्मेदवारीलाई पर्यटन क्षेत्रले चासोका साथ हेरेको छ।