प्रधानमन्त्री पदबाट राजीनामा मागिरहेका हर्क र बालेनबीच 'लभ–हेट'को सम्बन्ध

र्‍याप गायकको परिचय बनाइसकेका वालेन्द्र शाह 'बालेन'ले २०७९ साल वैशाखमा काठमाडौं महानगर प्रमुखमा स्वतन्त्र उम्मेदवारी दिँदै गर्दा धरानमा पनि अभियन्ताको छवि बनाइसकेका हर्कराज राई मेयर पदको तयारीमा थिए । चरम खानेपानी अभाव भोगिरहेको धरानमा हर्कले उठाएको एउटै बलियो मुद्दा थियो– मेरो नेतृत्वमा धरानवासीलाई पानी ख्वाउँछु ।

यी दुई व्यक्तिले स्थापित दलका प्रतिनिधिलाई पछि पार्दै चुनाव जिते । दुवैको एउटै चुनाव चिह्न थियो– लौरो । चुनावपछि पहिलोपटक काठमाडौं आएर हर्कले बालेनलाई भेटे । बालेनको कार्यकक्षमा पुगेका हर्कले सिलाम साक्मा लगाइदिए, जुन किराँती संस्कृतिमा निकै महत्त्वपूर्ण मानिन्छ, जुन तस्वीर सामाजिक सञ्जालमा राखेर बालेनले लेखेथे– ‘सिलाम साक्माले मृत्युको बाटो छेकेझैँ नेपालमा विकासको बाटो कसैले छेक्न नसकोस् ।’