हालसालै भाटभटेनी लुटपाट र तोडफोड भएको भ्रम सिर्जना गर्न जेनजी आन्दोलनको पुरानो भिडिओ भाइरल

काठमाडौं । पछिल्लो केही दिनदेखि सामाजिक सञ्जालमा भाटभटेनी सुपरमार्केटमा तोडफोड र आगजनी भइरहेको भन्दै एउटा भिडिओ तीव्र रूपमा भाइरल भइरहेको छ । फेसबुकमा दीपक पौडेल नामका प्रयोगकर्ताले ४ अगस्ट (साउन १९ गते) सार्वजनिक गरेको उक्त भिडिओ ले सर्वसाधारणमा भ्रम र त्रास सिर्जना गरेको पाइएको छ ।

७ मिनेट २५ सेकेन्ड लामो उक्त भिडिओमा भाटभटेनी सुपरमार्केटको भवनबाट कालो धुवाँको मुस्लो निस्किरहेको देखिन्छ । भिडिओमा मानिसहरूले स्टोरभित्र पसेर सामान लुटपाट गरिरहेको दृश्य छ । भिडिओ खिचिरहेका व्यक्तिले लुटपाटमा संलग्नहरूलाई बाहिर निस्किन आग्रह गर्दै अश्लील शब्द प्रयोग गरेर गालीगलौज गरेको सुनिन्छ । भिडिओको अन्त्यतिर युवाहरूबिच हानाहान भएको र आगो फैलिएपछि मानिसहरू भागाभाग गरेको दृश्यले यो कुनै हालकै घटना हो कि भन्ने भान पार्छ ।