दक्षिण कोरियामा युनिफिकेशन चर्चकी नेतृलाई दुई वर्ष जेल : नेपालसँग जोडिएको आरोप खारेज

दक्षिण कोरियाको एक अदालतले युनिफिकेशन चर्चकी नेतृ हान हाक-जालाई राजनीतिक चन्दा र घुससम्बन्धी मुद्दामा दुई वर्ष जेल सजाय सुनाएको छ। तर नेपाल र सेनेगलका राजनीतिज्ञलाई चुनावी खर्च दिन चर्चको रकम हिनामिना गरेको आरोप भने खारेज भएको छ।

सियोल केन्द्रीय जिल्ला अदालतले सोमबार ८३ वर्षीया हानलाई पूर्वराष्ट्रपति युन सुक येओलकी पत्नी तथा पूर्वप्रथम महिला किम केओन हीलाई महँगा उपहार दिन सहयोग गरेको र तत्कालीन सांसद क्वेन सियोङ-डोङलाई अवैध रकम दिएको अभियोगमा दोषी ठहर गरेको हो। अदालतले राजनीतिक चन्दा र घुससम्बन्धी दुई छुट्टाछुट्टै कानुन उल्लंघनमा हानलाई एक-एक वर्ष गरी कुल दुई वर्ष जेल सजाय सुनाएको हो।