ग्यास आपूर्ति कम भएको हो ?

आधा सिलिन्डर ग्यास दिँदा बजारमा खासै समस्या थिएन, तर अहिले ‘भरी सिलिन्डर ग्यास पाइने’ भन्नेबित्तिकै ग्यास पसलहरूमा लामो लाइन देखिन्छ। यस्तो किन भइरहेको छ, नागरिकलाई थाहा छैन। ग्यास आपूर्तिमै कमी आएको हो कि व्यापारीले चलखेल गरेका हुन् ? सम्बन्धित निकायले तत्काल अनुगमन गरी सत्यतथ्य जनतालाई जानकारी गराउनुपर्‍यो।

आधा सिलिन्डर ग्यास वितरण गर्दा तौल धेरै कम आउने गरेको गुनासो थियो। कम्तीमा अहिले पूरा सिलिन्डर पाइने भयो भनेर नागरिक खुसी भएका थिए। तर, बिडम्बना ! अहिले ग्यास नै पाइँदैन। अब के गर्ने ? कसलाई भन्ने ? नेपाल आयल निगमले बजारमा ग्यास पर्याप्त छ भनिरहँदा किन खाना पकाउने ग्यासको यति धेरै अभाव भएको छ ? एक सिलिन्डर ग्यास लिनका लागि एक महिनाअघिदेखि नाम लेखाउनुपर्ने बाध्यता छ। त्यति गर्दा पनि सहजै पाइँदैन, घण्टौं लाइन बस्नुपर्छ।