दाङमा झण्डै ३५ हजार हेक्टरमा रोपाईं सकियो

काठमाडौं - दाङमा कुल खेतीयोग्य जमिन ७४ हजार ३ सय ३६ हेक्टरमध्ये झण्डै ५० प्रतिशत जमिनमा धान खेती हुँदै आएको छ । कृषि ज्ञान केन्द्र घोराहीका अनुसार जिल्लाको धान खेती हुने कुल ३७ हजार २ सय २५ हेक्टर जमिनमध्ये बुधबारसम्म ३४ हजार ९ सय ९१ हेक्टर खेतमा धान रोपाईं सकिएको छ । कार्यालयले हालसम्म ९४ प्रतिशत खेतमा धान रोपाईं भएको जनाएको छ ।

जिल्लाको देउखुरी क्षेत्र लमही नगरपालिका, राप्ती, गढवा र राजपुर गरी चारवटा पालिकामा सिंचाई सुविधा भएका कारण समयमै धान खेती भएको छ । घोराही उपमहानगरपालिकामा आठ हजार ९७ हेक्टर, तुलसीपुर उपमहानगरपालिकामा छ हजार ७ सय ९५ हेक्टर, दंगीशरण गाउँपालिकामा तीन हजार ४ सय १२ हेक्टर, गढवा गाउँपालिकामा तीन हजार २ सय ८० हेक्टर र लमही नगरपालिकामा तीन हजार २ सय ५० हेक्टरमा धानखेती हुँदै आएको कार्यालयले जनाएको छ ।