आत्महत्याको बढ्दो शृङ्खला राष्ट्रिय बहसको विषय

नेपालमा पछिल्लो समय भएका आत्महत्याका घटनाले नेपाली समाजलाई गम्भीर रूपमा झस्काएको छ । सार्वजनिक स्थलमै शरीरमा पेट्रोल खन्याई आत्महत्या गरेका वा आत्महत्याको प्रयास गर्दागर्दै प्रहरीले उद्धार गरेका समाचार निरन्तर सार्वजनिक भइरहेका छन् । यस्ता घटनाले आत्महत्या अब कुनै व्यक्तिको निजी निर्णय मात्र नभई सार्वजनिक सरोकार र राज्यको नीतिसँग जोडिएको राष्ट्रिय चुनौती बनेको इंगित गरेको छ । आत्महत्याको पछाडि एउटै मात्र कारण हुँदैन ।

आर्थिक संकट, बेरोजगारी, ऋणको बोझ, पारिवारिक विखण्डन, वैवाहिक तनाव, अध्ययन र रोजगारीको चर्को प्रतिस्पर्धा, सामाजिक सञ्जालबाट सिर्जित समस्या, एक्लोपन, लागूपदार्थको दुरुपयोग तथा मानसिक स्वास्थ्यसम्बन्धी विभिन्न समस्याले मानिसलाई निराशाको गहिराइमा पु¥याउन सक्छ । अझ नेपालमा मानसिक रोगबारे खुलेर कुरा गर्न हिच्किचाउने सामाजिक संस्कारले समस्या झन् जटिल बनेको छ । उपचार गर्नुपर्ने अवस्थालाई लुकाउने प्रवृत्तिले पनि समस्या जटिल बनाइरहेको छ । यसमा राज्यका तर्फबाट हुने गरेका अनेक दबाबले समस्या चर्काउने गरेको पनि पछिल्ला केही घटनाले इंगित गरेका छन् ।