ब्रोड पिक हिमपहिरोमा ज्यान गुमाएका पर्वतारोही गुरुङको अन्त्येष्टि

पाकिस्तानको ब्रोड पिक हिमाल आरोहणका क्रममा हिमपहिरोमा परी ज्यान गुमाएका अनुभवी नेपाली पर्वतारोही पुरबहादुर गुरुङ (युक्त) को शुक्रबार काठमाडौंको स्वयम्भूमा धार्मिक परम्पराअनुसार अन्त्येष्टि गरिएको छ। अन्तिम संस्कारअघि स्वयम्भू परिसरमा उनको पार्थिव शरीरमा श्रद्धाञ्जली अर्पण गरिएको थियो।

श्रद्धाञ्जली कार्यक्रममा गृहमन्त्री सुधन गुरुङ, पूर्वउपसभामुख इन्दिरा रानामगर, नेपाल पर्वतारोहण संघका पदाधिकारी, पर्यटन क्षेत्रका प्रतिनिधि तथा पर्वतारोहण समुदायका सदस्यहरूको उपस्थिति रहेको थियो। सो अवसरमा गृहमन्त्री गुरुङले राष्ट्रिय झन्डा ओढाएर दिवंगत पर्वतारोही गुरुङप्रति सम्मान प्रकट गरेका थिए।