विपद् पीडितका लागि सबै सांसदले ५०/५० हजार जम्मा गरेर कोष बनाउन हर्कराज राईको प्रस्ताव

काठमाडौँ । श्रम संस्कृति पार्टीका संसदीय दलका नेता हर्कराज राईले देशमा भइरहेका प्राकृतिक विपत्ति र विभिन्न दुर्घटनाका पीडितहरूलाई सहयोग गर्न सबै सांसदहरूले आफ्नो पारिश्रमिकबाट ५०/५० हजार रुपैयाँ योगदान गर्नुपर्ने विशेष प्रस्ताव अघि सारेका छन् ।

प्रतिनिधिसभाको शुक्रबारको बैठकमा विशेष समयमा बोल्दै सांसद राईले जननिर्वाचित प्रतिनिधिहरू नागरिकको दुःखमा सारथी बन्नुपर्ने भन्दै यस्तो प्रस्ताव गरेका हुन् । पछिल्लो समय देशका विभिन्न भागमा बाढी, पहिरो जस्ता प्राकृतिक प्रकोप र सडक दुर्घटनाका कारण धेरै नागरिकले ज्यान गुमाउनुका साथै ठूलो धनजनको क्षति बेहोर्नुपरेको उल्लेख गर्दै उनले राहतका लागि सांसदहरूले नै अग्रसरता देखाउनुपर्ने बताए ।