मिडिया काउन्सिल विधेयकमा प्रेस स्वतन्त्रता र स्वनियमनमा जोड

सूचना तथा सञ्चार मन्त्रालयले ‘मिडिया काउन्सिल विधेयक, २०८३’ को मस्यौदामाथि सञ्चार क्षेत्रका सरोकारवालासँग छलफल गरी सुझाव सङ्कलन थालेको छ। शुक्रबार मन्त्रालयमा आयोजित छलफलमा विभिन्न सञ्चारमाध्यमका सम्पादक तथा प्रतिनिधि, नेपाल पत्रकार महासंघ, प्रेस काउन्सिल र पत्रकारितासम्बन्धी संघसंस्थाका प्रतिनिधिले विधेयकमा समेटिनुपर्ने विषय तथा सञ्चार क्षेत्रका चुनौतीबारे सुझाव दिएका छन्।

सूचना तथा सञ्चारमन्त्री डा. विक्रम तिमिल्सिनाले प्राप्त सुझावका आधारमा उत्कृष्ट, कार्यान्वयनयोग्य र भविष्यमुखी विधेयक तयार गरिने बताए। उनले प्रेस तथा अभिव्यक्ति स्वतन्त्रताको सुनिश्चिततासँगै सञ्चारमाध्यमलाई जिम्मेवार र उत्तरदायी बनाउन सरकार प्रतिबद्ध रहेको बताए। स्वच्छ, मर्यादित र उत्तरदायी पत्रकारिताका लागि स्वायत्त नियामक निकायका रूपमा मिडिया काउन्सिल स्थापना गर्ने सरकारको उद्देश्य रहेको उनको भनाइ छ।