परराष्ट्रमन्त्री खनाल र अमेरिकाकी उपविदेशमन्त्री हुकरबीच टेलिफोन वार्ता

काठमाडौं, भदौ ११ गते । परराष्ट्रमन्त्री शिशिर खनालले अमेरिकी राजनीतिक मामिला उपविदेशमन्त्री एलिसन हुकरसँग विहीबार टेलिफोन वार्ता गर्नुभएको छ। वार्ताका क्रममा उपविदेशमन्त्री हुकरले बुधबार आएको विनाशकारी बाढीबाट भएको जनधनको क्षतिप्रति अमेरिकी सरकारका तर्फबाट गहिरो दुःख तथा समवेदना व्यक्त गर्नुभयो। रसुवा, नुवाकोटलगायतका क्षेत्रमा आएको विनाशकारी बाढीबाट बुधबार ठूलो जनधनको क्षति भएपछि प्रभावित क्षेत्रमा खोज, उद्धार तथा राहत कार्य जारी रहेका बेला उक्त टेलिफोन वार्ता भएको हो।

उपविदेशमन्त्री हुकरले विपद्को यस कठिन घडीमा नेपाललाई परिस्थितिसँग जुध्न सहयोग गर्ने अमेरिकी सरकारको प्रतिबद्धता व्यक्त गर्दै नेपाल र नेपाली जनताप्रति ऐक्यबद्धता जनाउनुभयो। उपविदेशमन्त्री हुकरले बाढीबाट प्रभावित नागरिकको खोज तथा उद्धारका लागि सरकारले सञ्चालन गरिरहेको अभियानबारे जानकारी लिनुका साथै बेपत्ता अमेरिकी नागरिकको खोजी तथा उद्धारको अवस्थाबारे समेत चासो राख्नुभयो।