नेपाली सञ्चारका चुनौती

नेपालका पहिलो जननिर्वाचित प्रधानमन्त्री बिपी कोइरालाले सानो पुँजीमा चलेका सानो आकारका नेपाली पत्रपत्रिकाको विकासका लागि सरकारले अनुदान दिने निर्णय गर्नुभएको थियो। त्यो बेला नेपालको राजधानी काठमाडौंबाट गोरखापत्र दैनिक प्रकाशित हुन्थ्यो। गोरखापत्र सरकारकै एउटा उपक्रम थियो।

२००७ सालमा प्रजातन्त्रको स्थापनापछि देशका केही बौद्धिक व्यक्तिले पत्रपत्रिकाको प्रकाशन सुरु गरेका थिए। हरेक दिन साँझ नयाँ सडकको पिपल चौतारामा बिक्रीका लागि समाज, नयाँ समाज, हालखबर, स्वतन्त्र समाचार र अंग्रेजी भाषाको दि कमनरलगायत दर्जन बढी समाचारपत्रको बजार लाग्थ्यो।