सालझण्डी–ढोरपाटन सडकको कालोपत्रे कार्य यसै बर्ष अघि बढ्छ: मन्त्री लम्साल

अर्घाखाँची- अर्घाखाँचीलाई तराईसँग जोड्दै बागलुङको ढोरपाटनसम्म पुग्ने महत्वपूर्ण सालझण्डी–सन्धिखर्क–ढोरपाटन सडक आयोजनाको बाँकी काम अघि बढ्ने भएको छ। सरकारका पूर्वाधार विकास मन्त्री सुनिल लम्सालले कालोपत्रे गर्न बाँकी रहेको करिब १ सय ४० किलोमिटर सडकखण्डको ठेक्का प्रक्रिया यसै वर्ष अघि बढाइने बताउनुभएको छ।

कुल १९७ किलोमिटर लम्बाइ रहेको सालझण्डी–सन्धिखर्क–ढोरपाटन सडकमा हालसम्म करिब ३६ किलोमिटर सडक कालोपत्रे भइसकेको छ। यो सडकको करिब ७० किलोमिटर खण्ड अर्घाखाँची जिल्लामा पर्छ। अर्घाखाँचीको सदरमुकाम सन्धिखर्क हुँदै जिल्लाका विभिन्न ग्रामीण क्षेत्रलाई तराईसँग जोड्ने भएकाले यो सडक जिल्लाको विकास र समृद्धिसँग प्रत्यक्ष जोडिएको महत्वपूर्ण आयोजना मानिन्छ।