नयाँ पोर्टलबाट नवीकरण गरिएका ड्राइभिङ लाइसेन्स नागरिक एपमा ‘एक्सपायर’ देखिने समस्या

काठमाडौं । सरकारले हालै सञ्चालनमा ल्याएको नयाँ सवारी चालक अनुमतिपत्र (ड्राइभिङ लाइसेन्स) पोर्टलबाट अनुमतिपत्र नवीकरण गराउँदा त्यसको अद्यावधिक विवरण नागरिक एपमा नदेखिने गरेको पाइएको छ । नयाँ व्यवस्था अनुसार सवारी चालक अनुमतिपत्रको म्याद १० वर्षको हुने भए तापनि नयाँ पोर्टलबाट नवीकरण गर्दा नागरिक एपमा भने पुरानै अर्थात् ‘एक्सपायर’ भएको मिति देखिने गरेको हो ।

नयाँ पोर्टलबाट नवीकरणका सम्पूर्ण प्रक्रिया पुरा गरिसक्दा पनि नागरिक एपमा लिङ्क भएको लाइसेन्समा पुरानै विवरण देखिएको भन्दै सेवाग्राहीले गुनासो गरेका छन् । एक सेवाग्राहीले नयाँ पोर्टलमा आफ्नो लाइसेन्स नवीकरण भई सन् २०३६ सम्मको वैधता दिए पनि नागरिक एपमा भने अझै ‘एक्सपायर्ड’ नै देखाइरहेको सुनाए ।