गुल्मी अस्पताल भवन निर्माणमा ढिलाइ, ठेक्का रद्द गर्न मन्त्री लम्सालको निर्देशन

२४ साउन, गुल्मी । दुई वर्षभित्र सम्पन्न गर्ने लक्ष्यसहित निर्माण सुरु गरिएको गुल्मी अस्पतालको भवन पाँच वर्ष पुग्न लाग्दासमेत निर्माण पूरा हुन सकेको छैन् । आज यही अस्पतालको निरीक्षणमा भौतिक पूर्वाधार तथा यातायात मन्त्री सुनिल लम्साल पुगे । अनुगमनपछि उनले ठेक्का रद्द गरी नयाँ टेन्डर आह्वान गर्न निर्देशन दिएका छन् ।

अनुगमनका क्रममा मन्त्री लम्सालले निर्माण कम्पनी, इन्जिनियर तथा अस्पताल प्रशासनसँग भवन निर्माणको प्रगति, बाँकी काम र ढिलाइका कारणबारे जानकारी लिएका थिए । निर्धारित समयभित्र काम सम्पन्न हुन नसकेकोप्रति असन्तुष्टि जनाउँदै उनले अब थप ढिलाइ स्वीकार्य नहुने भन्दै ठेक्का रद्द गरेर नयाँ प्रक्रियाबाट काम अघि बढाउन निर्देशन दिएका हुन् ।