सीमा क्षेत्रमा निगरानी र कडाइसँगै एकपछि अर्को सफलता

राजविराज । प्रहरीले भारतीय सीमासँग जोडिएको पालिका क्षेत्रमा निगरानी र रात्री गस्ति तीब्र बनाएपछि ठुलो परिमाणमा एकपछि अर्को लागुऔषध गाँजा र चोरी पैठारीका सरसमान बरामद हुन थालेको छ ।

पछिल्लो पटक शुक्रवार मध्यराती सप्तरीको राजगढ गाउँपालिका १ स्थित नहर छेऊबाट प्रहरीले १ सय ९० किलोभन्दा बढी प्रतिबन्धित लागुऔषध गाँजा बरामद गरेको छ । रात्री गस्तीमा रहेका बोर्डर आउट पोष्ट (बीओपी) बनैनिया र नेपाल प्रहरीको संयुक्त टोलीले नहर किनारको झारपातमा पाँच वटा बोरामा लुकाइ राखिएको १ सय ९० किलो ५०० ग्राम गाँजा बरामद गरेको छ ।