अझै २८ जिल्लामा कांग्रेसको क्रियाशील सदस्यता विवाद

काठमाडौँ । नेपाली कांग्रेसभित्रको आन्तरिक विवादको मुख्य जड मानिने क्रियाशील सदस्यताको विवाद अझै २८ जिल्लामा कायमै रहेको पाइएको छ ।

आइतबार महामन्त्री तथा सदस्यता व्यवस्थापन समितिका संयोजक प्रदीप पौडेलले केन्द्रीय कार्यसमिति बैठकमा प्रस्तुत गरेको पछिल्लो तथ्यांकअनुसार देशका विभिन्न २८ जिल्लाका ६० भन्दा बढी निर्वाचन क्षेत्र र स्थानीय तहमा सदस्यता सम्बन्धी विवाद टुंगिन बाँकी देखिएको हो । संयोजक पौडेलले सार्वजनिक गरेको सूचीअनुसार कतिपय जिल्लामा केन्द्रबाट खटिएका नेताहरूले काम गरिरहेका छन् भने कतिपयमा प्राविधिक कारणले अद्यावधिक हुन सकेको छैन ।