राष्ट्रिय बाल सहभागिता दिवस मनाउन अपिल

बालबालिकाको स्वतन्त्र रूपमा सङ्गठित हुन पाउने अधिकारलाई सम्मान गर्दै साउन २५ गतेलाई राष्ट्रिय बाल सहभागिता दिवसका रूपमा मनाउन बाल अधिकार क्षेत्रमा क्रियाशील संस्थाले अपिल गरेका छन्।

बालबालिकाले स्वतःस्फूर्त रूपमा स्थापना गरेको जागृति बाल क्लब नेपाललाई जिल्ला प्रशासन कार्यालय नवलपरासीले दर्ता नगरेपछि बालबालिकाले आफ्ना अधिकारका लागि सङ्गठित हुन पाउनुपर्ने मागसहित २०५५ माघ ४ गते बालबालिकाको तर्फबाट तिलोत्तम पौडेलले सर्वोच्च अदालतमा मुद्दा दायर गरेका थिए। उक्त मुद्दामा सर्वोच्च अदालतले २०५८ साल साउन २५ गते बालबालिकाले सङ्गठन स्थापना गर्न तथा सङ्गठित हुन पाउने पक्षमा ऐतिहासिक फैसला गरेको थियो।