थोरै क्षेत्रफलमा धेरै भए बाघ, अब संख्या नबढाइने

सीमावर्ती जिल्ला कञ्चनपुरमा रहेको शुक्लाफाँटा राष्ट्रिय निकुञ्ज ३ सय ५ वर्ग किलोमिटर क्षेत्रफलमा फैलिएको छ। विशाल घाँसे मैदानमा सयौँको बथानमा बाह्रसिंगे देखिने यो निकुञ्ज पाटेबाघ हेर्नका लागि पनि उत्तिकै आकर्षक मानिन्छ। विशाल घाँसे मैदान, प्रशस्त आहारा प्रजाति र खानेपानी उपलब्ध भएकाले शुक्लाफाँटा राष्ट्रिय निकुञ्जमा बाघको संख्या उल्लेख्य रूपमा बढेको छ। थोरै क्षेत्रफलमा ५० पाटेबाघ रहेका छन्।

बाघ जंगलमा निश्चित इलाका छुट्याएर बस्ने गर्छ। संरक्षणकर्मीका अनुसार भाले बाघ आफ्नो इलाकाभन्दा बाहिर पनि निस्कँदैन र आफ्नो इलाकामा अन्य भाले बाघलाई आउन पनि दिँदैन।