लगानीमैत्री वातावरणको चुनौती: छाया सेन्टर विवादले उठायो निजी तथा विदेशी लगानीको सुरक्षामाथि प्रश्न

परराष्ट्रमन्त्री शिशिर खनाल असार पहिलो साता उत्तरी छिमेकी चीनको औपचारिक भ्रमणमा थिए । भ्रमणको क्रममा दुई मुलुकका परराष्ट्र मन्त्रीहरुबीच छलफल हुँदा चिनियाँ विदेशमन्त्री वाङ यीले चिनियाँ कम्पनीका लागि नेपालमा लगानीको वातावरण बनाउन आग्रह गरे । उनले चिनियाँहरु नेपालमा लगानी गर्न तयार रहेको सन्देश दिनुको साथै त्यसका लागि वातावरण बनाउनुपर्नेमा पनि उत्तिकै जोड दिए ।

चिनियाँ विदेशमन्त्रीले लगानीको वातावरण खोज्नुले सरकारले जेजसो भने पनि नेपालमा लगानीकर्ता ढुक्क छैनन् भन्ने छर्लङ्ग हुन्छ । योमात्र होइन, नेपालमा लगानी गर्न विदेशीहरु ढुक्क छैनन् भन्ने अन्य धेरै उदाहरण छन् । विगतमा होङ्सी सिमेन्ट जस्ता कतिपय लगानीकर्ता उपयुक्त वातावरण नपाएपछि फर्किएका अनुभव छन् । यही बसेर लगानी गर्नेहरु पनि सधैं अनेक चुनौती र जोखिमको धारमा छन् ।