संविधानमाथिको अनावश्यक विवाद देशका लागि घातक : आङ्देम्बे

प्रमुख प्रतिपक्षी दल नेपाली कांग्रेसका संसदीय दलका नेता भीष्मराज आङ्देम्बेले मुलुकको वर्तमान शासकीय व्यवस्था र संघीय संरचनामाथि प्रश्न उठाउने गतिविधिप्रति गम्भीर असन्तुष्टि व्यक्त गरेका छन्। संसद दिवसको अवसरमा मंगलबार सिंहदरबारमा आयोजित विशेष कार्यक्रममा बोल्दै उनले राजनीतिक नेतृत्वका कमजोरीलाई व्यवस्थामाथि दोषारोपण गर्नु गलत प्रवृत्ति भएको बताएका हुन्।

नेता आङ्देम्बेले संघीय लोकतान्त्रिक गणतन्त्र र अहिलेको शासकीय स्वरूपमाथि भइरहेको आलोचना र आक्रमणको प्रयासले सकारात्मक सन्देश नदिने उल्लेख गरे। नेता आङदेम्बेले पर्याप्त अभ्यास र गहिरो समझबिना वर्तमान व्यवस्थामाथि प्रश्न उठाउनु राजनीतिक अपरिपक्वताको संकेत हुने बताए।