बालेनको प्रवर्द्धनपछि डीडीसीको वित्तीय अवस्थामा सुधार: कृषकको बक्यौता ७२ करोडबाट ३५ करोडमा झर्‍यो

काठमाडौं। प्रधानमन्त्री वालेन्द्र साह (बालेन) ले सामाजिक सञ्जालमार्फत दुग्ध विकास संस्थान (डीडीसी) का उत्पादनहरूको प्रवर्द्धन गरेसँगै यसको बिक्रीमा उल्लेख्य सुधार आएको छ । यसले संस्थानको वित्तीय अवस्थालाई पनि सकारात्मक दिशामा लैजान थालेको छ। पछिल्लो तीन महिनाको अवधिमा डीडीसीले कृषकलाई तिर्न बाँकी रहेको ७२ करोड रुपैयाँको बक्यौता रकम घटाएर करिब ३५ करोड रुपैयाँमा झारेको जनाएको छ।

लामो समयदेखि नगद अभाव, बढ्दो मौज्दात र कृषकको भुक्तानीमा ढिलाइको समस्या झेलिरहेको संस्थानले आन्तरिक सुधार, खर्च कटौती र आक्रामक बजारीकरणमार्फत यो सफलता हासिल गरेको हो। गत जेठ २ गते प्रधानमन्त्री साहले सामाजिक सञ्जाल फेसबुकमार्फत डीडीसीको चिजको प्रवर्द्धन गर्दै स्वदेशी उत्पादन प्रयोग गर्न आह्वान गरेका थिए भने उनको यो अभियानलाई कृषि, वन तथा वातावरण मन्त्री गीता चौधरीले पनि साथ दिएकी थिइन्। त्यसपश्चात डीडीसीका उत्पादनहरूप्रति उपभोक्ताको आकर्षण बढेको र बिक्रीमा सुधार आएको अधिकारीहरूले बताएका छन्।