पार्टीको राष्ट्रिय भेला स्थगित भएको छैन : कांग्रेस

नेपाली कांग्रेसको राष्ट्रिय भेला आयोजक समितिले पूर्वमहामन्त्री डा शशांक कोइरालाको संयोजकत्वमा हुन गइरहेको पार्टीको राष्ट्रिय भेला स्थगित नभएको प्रस्टीकरण दिएको छ।

आयोजक समितिका संयोजक डा. कोइरालाको नाममा कार्यक्रम स्थगित भएको भन्दै एक विज्ञप्ति सामाजिक सञ्जालमा भाइरल भएपछि आयोजक समितिले सो को खण्डन गरेको हो। आयोजक समिति अन्तरगतको प्रचारप्रसार उपसमितिका संयोजक मीन विश्वकर्माले भेला स्थगितको फर्जी विज्ञप्ति जारी भएको भन्दै आपत्ति जनाएका हुन्।