सरकार–मेडिकल माफियाबीच साँठगाँठ रहेको डा. गोविन्द केसीको आरोप ,माग पूरा नभए २४औँ सत्याग्रह पुनः सुरु गर्ने चेतावनी

काठमाडौं ।

वरिष्ठ चिकित्सक प्रा. डा. गोविन्द केसीले सरकार र निजी मेडिकल शिक्षा व्यवसायीबीचको साँठगाँठका कारण सार्वजनिक चिकित्सा शिक्षा र स्वास्थ्य प्रणाली कमजोर बन्दै गएको आरोप लगाउँदै माग पूरा नभए स्थगित गरिएको २४औँ सत्याग्रहसहित सशक्त आन्दोलन पुनः सुरु गर्ने चेतावनी दिनुभएको छ। मंगलबार कास्कीबाट जारी गर्नुभएको प्रेस विज्ञप्तिमा डा। केसीले निजी मेडिकल कलेजहरूले इन्टर्न र आवासीय चिकित्सकको निर्वाह भत्ता रोक्ने चेतावनी दिएकोप्रति गम्भीर आपत्ति जनाउँदै सरकार त्यसप्रति मौन बसेको बताउनुभएको छ। उहाँले निजी मेडिकल कलेजसँग आबद्ध व्यक्तिहरूलाई स्वास्थ्य मन्त्रालय, चिकित्सा शिक्षा आयोग तथा मेडिकल विश्वविद्यालयजस्ता नियामक निकायमा नियुक्त गरिनुले स्वार्थ बाझिने अवस्था सिर्जना भएको दाबी गर्नुभएको छ।