बढ्दो महँगी, ग्यास अभाव र प्रभावहीन सरकार

अमेरिकी मनोवैज्ञानिक अब्राहम हारोल्ड मास्लोले सन् १९४३ मा मानव आवश्यकताको सिद्धान्त प्रतिपादन गरे । उनले उक्त सिद्धान्तमा ‘मानिसका आवश्यकता र उद्देश्य अनगिन्ती हुन्छन् र एउटा आवश्यकता पूरा हुनासाथ अर्को आवश्यकता स्वतस्र्फुतरूपमा आउँछ, आवश्यकताको शृङ्खला हुन्छ र असन्तुष्ट आवश्यकताले मानिसलाई उत्प्रेरणा दिन्छ’ भनेका थिए । मास्लोका अनुसार यी आवश्यकतामध्ये शारीरिक आवश्यकता पहिलो हो र अनिवार्य आवश्यकता पनि हो । यसअन्तर्गत खानपानका कुराहरु मुख्यरुपमा आउँछन् ।

देशमा विगत ४ महिनायता नयाँहरुको सरकार छ । नयाँ यस अर्थमा कि हाल सत्तारुढ राष्ट्रिय स्वतन्त्र पार्टी आफैँमा सबैभन्दा कान्छो पार्टी हो भने उक्त दलको चुनावी नारा पनि नयाँलाई छान्ने नै थियो । गरिब, निमुखा र न्यून आय भएका जनताका लागि केही गर्छौं भन्ने आकांक्षा यो दलसँग थियो । राजनीतिक लोकप्रियताका रुपमा गाँस, बास, कपासको नारा पनि मास्लोको यही आवश्यकताको पहिलो श्रेणीअन्तर्गतको शारीरिक आवश्यकताभित्रै पर्दछ ।