छायानाथमा धार्मिक तीर्थयात्रीहरुको भक्तिभाव

मुगु । कर्णाली प्रदेशअन्तर्गत मुगु जिल्लाको मुगुम कार्मारोङ गाउँपालिकामा रहेको प्रशिद्ध छायानाथ तीर्थस्थल हिन्दू धर्मावलम्बीहरुको लागि महत्वपूर्ण तीर्थस्थल हो । धार्मिक ग्रन्थमा उल्लेख भएअनुसार महादेवले सतीदेवीको मृत शरीरलाई बोकेर डुल्दै जाँदा सतीदेवीको अन्तिम शेष पतनका क्रममा भएको स्थान नै छायानाथ धाम हुन पुगेकाले हिन्दूहरुको पवित्र धाम मानिदै आएको छ । यसरी सतिको मृत देह गलेर पतन हुने क्रममा छायाक्षेत्र नामक स्थानमा बाँकी सबै अङ्गहरु पतन भए भन्ने कुरा पनि स्वस्थानी व्रतकथामा उल्लेख गरिएको छ ।

भगवान् शिवले सतीदेवीको मृत शरीर बोकेर हिँडेका बेलामा सतीदेवीका अङ्गहरु संसारका विभिन्न ठाउँमा पतन भएका थिए अथवा खसेका थिए । जुन ठाउँमा सतिका अङ्ग पतन भए, ती ठाउँमा एक–एकवटा देवी, योगिनी र महादेव उत्पन्न भएर शिवशक्ति स्वरुपले रहेका छन् । सतीदेवीका अङ्गहरु पतन भएर सात करोड पचास लाख शक्तिपीठहरु उत्पन्न भएका छन् । स्वस्थानी व्रतकथामा उल्लेख गरिएको छायाक्षेत्र यही छायानाथ मन्दिर रहेको स्थान हो भन्ने भनाइ रहेको छ ।