समितिमा आईजीपी कार्कीले भने - नेपाल प्रहरीको खरिदमा कुनै अनियमितता भएको छैन

काठमाडौँ । प्रहरी महानिरीक्षक (आईजीपी) दानबहादुर कार्कीले नेपाल प्रहरीको खरिद प्रक्रियामा कुनै पनि किसिमको आर्थिक अनियमितता वा भ्रष्टाचार नभएको बताएका छन्।

बुधवार संघीय संसद्को सार्वजनिक लेखा समितिको बैठकमा बोल्दै उनले खरिद प्रक्रियामा राज्यकोषको कुनै पनि रकम खर्च नभएकाले भ्रष्टाचारको वस्तुगत आधार नै विद्यमान नरहेको दाबी गरे। महानिरीक्षक कार्कीले सार्वजनिक खरिद ऐन र बोलपत्र कागजातमा उल्लेखित सर्तबमोजिम नै खरिद प्रक्रिया रद्द गरिएको जानकारी दिए। उनका अनुसार उक्त प्रक्रियामा कुनै पनि फर्मसँग सम्झौता (कन्ट्र्याक्ट एग्रिमेन्ट) नभएको, पेस्की वा भुक्तानी नगरिएको र मालसमान समेत दाखिला नभएकाले अनियमितताको प्रश्नै नउठ्ने जिकिर गरे।