एनसेल-स्मार्ट टेलिकममा ९६ अर्ब बिगो, २२ जनाविरुद्ध मुद्दा

स्मार्ट टेलिकमको लिलामीसँग जोडिएको प्रकरणमा ९६ अर्ब १२ करोड १७ लाख रुपैयाँ बिगो दाबी गर्दै २२ जनाविरुद्ध जिल्ला अदालत काठमाडौँमा मुद्दा दायर भएको छ। जिल्ला अदालत काठमाडौँका सूचना अधिकारी शिव खतिवडाका अनुसार जिल्ला सरकारी वकिल कार्यालयले बुधबार अभियोगपत्र दर्ता गरेको हो।

मुद्दामा स्मार्ट टेलिकम, एनसेल र नेपाल इन्भेष्टमेण्ट मेगा बैंकसमेतलाई प्रतिवादी बनाइएको छ। ती संस्थाका पदाधिकारी, सात विदेशी नागरिकलगायतविरुद्ध आपराधिक विश्वासघात तथा ठगी, संगठित अपराध र बैंक तथा वित्तीय संस्थासम्बन्धी कानुनअन्तर्गत अभियोग लगाइएको खतिवडाले बताए।