नेपालको चिकित्सा शिक्षामा त्रिसूत्रीय मार्गचित्र: 'बढाउने, पढाउने र पठाउने' नीति लागु गर्ने कि ?

नेपालको चिकित्सा शिक्षा पछिल्ला वर्षहरूमा उल्लेखनीय रूपमा विस्तार हुँदै गएको छ। मेडिकल कलेजहरूको संख्या वृद्धि हुनुका साथै एमबीबीएस, बीडीएस लगायतका कार्यक्रमहरूमा देशभित्रै अध्ययन गर्ने अवसर बढेको छ। चिकित्सा शिक्षा आयोगको नियमनमा गुणस्तर सुधार, प्रवेश परीक्षाको एकरूपता र पाठ्यक्रमलाई अन्तर्राष्ट्रिय मापदण्डअनुसार बनाउने प्रयास भइरहेको छ। साथै, विदेशी विद्यार्थी आकर्षित गर्ने, चिकित्सा पर्यटन विकास गर्ने र दक्ष स्वास्थ्य जनशक्ति उत्पादन गर्ने लक्ष्य समेत राखिएको छ।

यद्यपि, पूर्वाधारको कमी, शिक्षक अभाव र केही संस्थाहरूमा गुणस्तर सम्बन्धी चुनौतीहरू अझै कायम छन्। समग्रमा, नेपालमा चिकित्सा शिक्षा विस्तारको चरणमा रहेको र यसलाई अझ व्यवस्थित तथा गुणस्तरीय बनाउने आवश्यकता रहेको देखिन्छ। तर चिकित्सा शिक्षालाई केवल एउटा सेवा क्षेत्र वा आन्तरिक आवश्यकता परिपूर्तिको माध्यमका रूपमा मात्र हेर्ने संकुचित दृष्टिकोण परिवर्तन गर्ने बेला आइसकेको छ। बदलिँदो विश्वपरिवेशमा यस विधालाई राष्ट्रिय आर्थिक विकास, समृद्धि र शैक्षिक कूटनीतिको एउटा बलियो इन्जिन बनाउन सकिन्छ।