बुटवलका स्पामा प्रहरीको छापा, १२ जना पक्राउ

बुटवल : रुपन्देहीको बुटवल उपमहानगरपालिका र तिलोत्तमा नगरपालिका क्षेत्रमा सञ्चालित मसाज सेन्टर (स्पा) हरुमा अमर्यादित क्रियाकलाप गर्ने १२ जनालाई प्रहरीले पक्राउ गरेको छ । मंगलबार यस क्षेत्रका २५ वटा स्पाहरुमा सरोकारवाला निकायहरुको सहभागितामा इलाका प्रहरी कार्यालय बुटवलले अनुगमन गरेको हो ।

अमर्यादित क्रियाकलाप गरेको भेटिएपछि स्पा सञ्चालक, सेवाग्राही र कर्मचारीहरुलाई नियन्त्रणमा लिएर थप अनुसन्धान थालिएको इलाका प्रहरी कार्यालय बुटवलका प्रमुख एवं प्रहरी नायव उपरीक्षक निशान्त श्रीवास्तवले जानकारी दिए । उनका अनुसार सात जना महिला र पाँच जना पुरुषलाई नियन्त्रणमा लिइएको छ ।