अन्तरिम शान्ति सम्झौता ब्युँताउने विषयमा इरान–अमेरिकी वार्तामा छैन कुनै प्रगति

तेहरान । अमेरिका र इरानबीच खाडी क्षेत्रमा जारी युद्ध अन्त्य गर्ने स्थायी सहमति जुटाउने प्रयासमा कुनै प्रगति हुन सकेको छैन । एक वरिष्ठ इरानी स्रोतले बताएको भन्दै रोयटर्सले छापेको समाचार अनुसार जुनमा भएको अस्थायी शान्ति सम्झौता पुनः कार्यान्वयन गर्ने र त्यसका प्रतिबद्धता पूरा गर्ने समयसीमा तय गर्ने विषयमा पनि दुई पक्षबीच वार्ता अघि बढ्न सकेको छैन । बीच मंगलबार खाडी क्षेत्रमा पानीजहाजलाई लक्षित गरी नयाँ आक्रमणका घटना भएपछि अमेरिकी राष्ट्रपति डोनाल्ड ट्रम्पले इरानी नेतृत्वप्रति कडा टिप्पणी गरिरहेका बेला यो प्रतिक्रिया आएको हो ।

जुनमा भएको अस्थायी सम्झौताले सबै मोर्चामा सैन्य गतिविधि तत्काल र स्थायी रूपमा अन्त्य गर्ने व्यवस्था गरेको थियो । तर सम्झौता केही समयमै कमजोर बन्यो । ट्रम्पले जुलाई ७ मा सम्झौता समाप्त भएको बताएका थिए भने त्यसको एक सातापछि इरानको विदेश मन्त्रालयले सम्झौता निलम्बित भएको घोषणा गरेको थियो । सम्झौताअनुसार इरानले महत्वपूर्ण स्ट्रेट अफ होर्मुज पुनः खोल्ने प्रतिबद्धता पूरा नगरेको आरोप अमेरिकाले लगाउँदै आएको छ । उता, अमेरिकाले आफ्ना प्रतिबद्धता पूरा नगरेको आरोप इरानले लगाउँदै आएको छ । इरानको अनुसार अमेरिकाले इरानी बन्दरगाहमाथिको नाकाबन्दी हटाउने र रोक्का गरिएका इरानी सम्पत्ति फुकुवा गर्ने प्रतिबद्धता पूरा गरेको छैन ।