मध्यपहाडी राजमार्गको चौरजहारी खण्ड २० दिनका लागि बन्द

काठमाडौँ । मध्यपहाडी राजमार्ग अन्तर्गत रुकुम पश्चिमको चौरजहारी क्षेत्रमा आज (२०८३ जेठ २ गते) देखि यातायात सेवा पूर्ण रूपमा बन्द गरिएको छ । सडक डिभिजन कार्यालय, चौरजहारीले सडक ढलान कार्यका लागि आगामी २० दिनसम्म यो सडक खण्ड बन्द रहने जानकारी दिएको हो ।

मध्यपहाडी राजमार्गको स्यालापाखा–मुसिकोट खण्ड अन्तर्गत चौरजहारी नगरपालिका वडा नं. ३ को क्षेत्रमा अहिले आवधिक मर्मत सम्भारको काम भइरहेको छ । सोही योजना अन्तर्गत टाँटागाउँ स्यालाखोला (चौरजहारी) देखि मटेलातर्फ जोड्ने सडकमा ढलान कार्य गर्नुपर्ने भएकाले सडक बन्द गर्नु परेको सडक डिभिजन कार्यालयले जनाएको छ ।