वैदेशिक रोजगारीमा सरकारको नयाँ कदम, ‘अपरेसन इलिगल एजेन्ट क्लिन–अप’ सुरु

वैदेशिक रोजगारी क्षेत्रमा देखिएका बेथिति नियन्त्रण गर्न तथा श्रमिकलाई सहज र सुरक्षित सेवा उपलब्ध गराउने उद्देश्यले सरकारले दुई महत्वपूर्ण सुधार कार्यक्रम अघि बढाएको छ। युवा, श्रम तथा रोजगार मन्त्रालयले ‘अपरेसन इलिगल एजेन्ट क्लिन–अप’ अभियान सुरु गर्नुका साथै स्थानीय तहबाटै श्रम स्वीकृति सेवा उपलब्ध गराउने प्रक्रिया अगाडि बढाएको हो।

युवा, श्रम तथा रोजगार मन्त्री रामजी यादवले देशभरका ७५३ स्थानीय तहका रोजगार संयोजक र आप्रवासन स्रोत केन्द्रका काउन्सेलरहरूसँग भर्चुअल अन्तर्क्रिया गर्दै दुवै कार्यक्रमको औपचारिक शुभारम्भ गरेका हुन्।