प्रकृति र संस्कृतिको सङ्गम लमजुङको लामागाउँ

लमजुङ – लमजुङको दोर्दी गाउँपालिका–३ स्थित श्रीमञ्ज्याङ लामागाउँ प्रकृति, संस्कृतिसँगै धार्मिक आस्था र विश्वासको अनुपम सङ्गमजस्तै बनेको छ । परम्परागत रूपमा सजिएका गाउँका प्राचीन मौलिकता झल्काउने घरसँगै सफा चोक तथा बाटाहरू ढुङ्गाले छपक्क छापिएका छन् । पर्यटकीय राजधानी पोखराबाट डुम्रे, मध्यनेपाल, भोर्लेटार, सुन्दरबजार, भोटेओढार हुँदै बेलघारी पुल तरेर लामाबगर र थापाखेत हुँदै यो गाउँ पुग्न सकिन्छ । पोखराबाट सवारीसाधनमा करिब चार घण्टा र बेंसीसहरबाट दुई घण्टामा यहाँ पुगिन्छ ।