विपद्पछि पुनर्निर्माण गर्ने चक्रबाट निस्केर, नेपालकै विकासको ढाँचा पुनर्लेखन गर्नुपर्छ : मन्त्री गौतम

कानुन, न्याय तथा संसदीय मामिला मन्त्री सोविता गौतमले नेपालमा पटक–पटक दोहोरिइरहेका बाढी, पहिरो, भूकम्पलगायतका विपद्लाई ध्यानमा राख्दै विकासको ढाँचा नै पुनर्विचार गर्नुपर्ने बताएकी छन्।

मंगलबार सामाजिक सञ्जालमा लेख्दै मन्त्री गौतमले अब विपद्पछि पुनर्निर्माण गर्ने परम्परागत चक्रबाट बाहिर निस्केर विपद् सहन सक्ने गरी नेपालको विकासको ढाँचा नै पुनर्लेखन गर्ने समय आएको बताएकी हुन्। उनले पछिल्लो १२/१३ वर्षयता नेपालले एकपछि अर्को ठूलो विपद्को सामना गरिरहेको उल्लेख गर्दै हरेक विपद्पछि भत्किएका संरचना पुनर्निर्माण गर्ने मात्रै नभई भविष्यका विपद् सामना गर्न सक्ने गरी पूर्वाधार निर्माण गर्नुपर्नेमा जोड दिइन्।