बाढीपीडितको घाउमा कलाकर्मीको मल्हम

रसुवाको भोटेकोशीसहित विभिन्न जिल्लामा आएको बाढीपहिरोबाट प्रभावित नागरिकको राहत तथा उद्धारका लागि विभिन्न क्षेत्रका कलाकारले सहयोगको हात अघि बढाएका छन्। बाढीपहिरोमा परी ज्यान गुमाएकाहरूप्रति श्रद्धाञ्जलि अर्पण गर्दै कलाकारहरूले सामाजिक सञ्जालमार्फत दुःख व्यक्त गर्नुका साथै राहत तथा उद्धारका लागि आर्थिक सहयोगसमेत जुटाउन थालेका छन्।

कतिपय कलाकारले आफूले प्रधानमन्त्री दैवीप्रकोप उद्धार कोषमा जम्मा गरेको रकमको स्क्रिनसट सामाजिक सञ्जालमा सार्वजनिक गर्दै अरूलाई पनि सहयोग गर्न प्रेरित गरिरहेका छन्। कतिपय कलाकारले भने आफूले सहयोग गरेको रकमको विवरण ब्लर गरेर सार्वजनिक गरेका छन्। सहयोगको रकमभन्दा पनि विपद्को समयमा सबैले आफ्नो क्षमताअनुसार सहयोग गर्नुपर्छ भन्ने सन्देश दिन उनीहरूले यस्तो शैली अपनाएका हुन्।