विपद्को परिस्थितिलाई मिलेर सामना गरौँ

विपद्को यो पीडादायी घडीमा सरकारलाई दोष दिनु सबैभन्दा सजिलो काम हो । तर अहिले दोष कसको भन्ने हिसाबले मात्र सोच्दा वा टिप्पणी गर्दा नागरिक दायित्व पूरा गरेको ठहर हुँदैन । सरकारलाई सहयोग गर्दै अघि बढ्नुको विकल्प छैन । हो, विपत्ति बाजा बजाएर आउँदैन, राज्यले सकेसम्म पूर्वतयारी गर्ने हो ।

तिब्बतको भोटेकोशी हुँदै आएको बाढी चीनका लागि पनि पूर्वानुमानभन्दा बाहिर थियो, नेपालले समेत अनुमान गर्न सक्ने भएन । यसपटकको विपद्पछि सयौँ नागरिकको ज्यान गएको छ । राज्य निरीह भएर उद्धार तथा राहतमा जुट्नेबाहेक अरु विकल्प पनि छैन । ठूलो विपद्का बेला सरकार, समाज र विभिन्न तह–तप्का परिचालन हुनुपर्दछ । तर सरकार जति सक्षम भए पनि राज्य एक्लैले विपद् थेग्न सक्दैन । नागरिक, निजी क्षेत्र, नागरिक समाज र स्थानीय समुदायसँग राज्यको पूर्वनिर्धारित सहकार्य प्रणाली अघि बढाउनुपर्ने खाँचो छ ।