विद्यालय शिक्षा विधेयक ः किन बन्दै छ फलामे चिउरा ?

साढे पाँच दशकदेखि नेपालको शिक्षा प्रणालीलाई हाँक्दै आएको विद्यालय शिक्षा ऐनलाई परिमार्जन गरी युगको मागबमोजिम समाज रुपान्तरण, रोजगारी, राष्ट्रको प्रगति र समग्रमा नागरिक समृद्धिका लागि नयाँ शिक्षा ऐन निर्माण र यसको अक्षरशः कार्यान्वयन हुनुपर्ने आवाज बारम्बार सुनिदै आएको हो । सोही आवाज र आवश्यकतालाई ध्यानमा राखी सरकार यतिखेर विद्यालय शिक्षा विधेयकको मस्यौदा तयारी–गृहकार्यमा जुटेको छ ।

अघिल्ला सरकारहरुले पटक–पटक प्रयास गर्दा पनि नयाँ शिक्षा ऐन जारी गर्ने कार्यमा सफलता प्राप्त गर्न नसकेको सन्दर्भमा राष्ट्रिय स्वतन्त्र पार्टी नेतृत्वको सरकारले यो ऐन निर्माण गर्नका लागि प्रतिबद्ध भएर लागेको देखिनु निश्चय नै सकारात्मक पक्ष हो, यद्यपि सरकारका लागि यो कार्य कम चुनौतीपूर्ण छैन । विगतका सरकारका लागि दलीय तथा सम्बद्ध शिक्षकका संघ–संगठनहरुको दबाबका कारण जति धेरै जटिलता थियो, वर्तमान सरकारका लागि त्यति नै दबाबपूर्ण र समस्याग्रस्त त नहोला, तर पनि विवादमुक्त नै हुनेछ भन्ने बलियो आधारचाहिँ भेटिँदैन । त्यति हुँदाहुँदै पनि वर्तमान सरकारको संरचना, युवा नेतृत्व र लक्ष्य प्राप्तिका लागि डटेर लागिपर्ने सकारात्मक प्रवृत्तिले केही आशा भने जगाएको छ ।